Ai është një nga talentet më premtues dhe nga një basketbollistët më të mirë që luan aktualisht në Nba. Prandaj te Clevelandi duke filluar që nga drejtuesit e deri tek tifozët, askush nuk e imagjinon dot skuadrën pa Kyrie Irving në përbërje. Kërkesa e 25-vjecarit të lindur në Melbourne për tu larguar nga Cavaliers ka bërë menjëherë xhiron e botës, madje në Ohio tashmë flitet vetëm për cështjen Irving, do të qëndrojë apo do të largohet ai nga nënkampionët e Nba. Pak lojtarë kanë kurajon për të kërkuar largimin, me këto fjalë ish menaxheri i përgjithshëm i Cleveland-it David Griffin tashmë në rolin e analistit ka vlerësuar zgjedhjen që ka bërë Irving, i cili është paraqitur në zyrat e pronarit Dan Gilbert për të sqaruar pozicionin e tij në skuadër, duke i kërkuar atij ta lejojë të vazhdojë karrierën e tij në një tjetër skuadër. Nëse Irving largohet Cleveland do ta ketë të vështirë të luftojë sërish për të fituar titullin kampion në Nba, sepse e ashtuquajtura Big Three, që tashmë përbëhet nga Lebron James-Kyrie Iriving dhe Kevin Love, do të humbiste një nga shtyllat e saj më të rëndësishme. Dëshira e Irving për ti dhënë lamutumirën skuadrës me të cilën fitoi titullin kampion në vitin 2016 ka të bëjë edhe faktin, se 25-vjecari është i sigurtë për potencialin e madh që zotëron dhe nuk kërkon të jetë gjatë gjithë kohës nën hijen e Lebron James.
