Romelu Lukaku dhe idhulli i tij, Adriano, tërhoqën vëmendjen e tifozëve të shumtë të Interit nëpërmjet një komunikimi në Instagram. Sulmuesi belg e ritheksoi se i ashtuquajturi “Perandori” e ka frymëzuar karrierën e tij.
“Ky futbollist ka bërë gjëra të mëdha për Interin dhe përfaqësuesen e Brazilit. Ishte idhulli im i fëmijërisë. Nëse do të luanim bashkë, do të shënonim 70 gola në sezon. I kam parë golat e “Perandorit” në YouTube, prandaj nuk ekzistonte asnjë klub tjetët në Itali veç Interit. Conte dhe stafi i tij po me ndihmojnë shumë. Pas asaj situate të krijuar te Manchester United, ishte shumë e rëndësishme të shkoja në një klub ku do të më ndihmonin shumë. Këtu e gjithë familja ime ndihet mirë.”
Adriano, nga ana tjetër, nuk u kurseu lëvdata për sulmuesin belg.
“Të premtoj që do të vij të të takoj së shpejti në “Appiano Gentile”. Ti je një futbollist i madh, këtë e di edhe ti. Tani ke marrë vendin tim, jam i lumtur për ty dhe Interin. Milano është një qytet i mrekullueshëm dhe tifozët janë gjithmonë përkrah skuadrës, sa herë që ajo ka nevojë. Kujtimet e mia? Goditja e lirë kundër Realit dhe aksioni individual ndaj Undineses, këta janë golat e mi më të bukur si zikaltër. Nuk do ta harroj kurrë derbin e fituar 3-2 në minutën e fundit.”
