Me 3 golëshin e realizuar ndaj Spanjës, Cristiano Ronaldo jo vetëm që i dha një pikë Portugalisë por hodhi kandidaturën për kryegolashënuesin e Botërorit ndërsa u zgjodh edhe lojtari më i mirë i ndeshjes. Në një intervistë pas ndeshjes Ronaldo foli për performancën e tij duke e cilësuar barazimin si rezultatin më të drejtë. “ Ky është fryti i punës së gjithë këtyre viteve. Njerëzit gjithmonë kanë besuar tek unë dhe unë punoj për vendin tim. Dëshironim të fitonim por mendoj se barazimi ishte rezultati më i drejtë për rastet që u krijuan. Spanja kishte kontrollin e topit dhe skuadra u sakrifikua nga fillimi deri në fund. Kishim përballë një prej skuadrave favorite për fitimin e Botërorit”, deklaroi CR7-ta.
Në krahun tjetër trajneri i Spanjës Fernando Hierro u shfaq i kënaqur me paraqitjen e skuadrës teksa shtoi se kur ke përballë një prej lojtarëve më të mirë në Botë si Cristiano Ronaldo çdo rezultat është i pranueshëm.