Qeveria italiane miratoi hapjen e dyerve të stadiumit “Olimpico” të paktën në masën 25% të kapacitetit për ndeshjet e Kampionatit Europian, ndërsa pas kreut të federatës italiane Gabriele Gravina, vendimi është përshëndetur edhe nga kreu i Ligës së Serisë A, Paolo Dal Pino.
Ky i fundit e quajti një lajm të jashtëzakonshëm vendimin e qeverisë italiane dhe në përfundim të mbledhjes së Ligës së Serisë A përsëriti apelin që të hapen stadiumet edhe për ndeshjet e kampionatit deri në fund të sezonit.
“Mirëpres ngrohtësisht vendimin e qeverisë për të lejuar praninë e tifozëve në masën 25% të kapacitetit të stadiumit gjatë ndeshjeve të Kampionatit Europian. Tashmë presim që në javët e mbetura të kampionatit të na lejohet të mirëpresim të paktën 1000 tifozë për ndeshje, një shifër me të cilën nisëm sezonin dhe që na jem mundësinë të garantojmë distancimin fizik mes tyre”, deklaroi Dal Pino.
Kreu i Ligës së Serisë A e quajti vendimin e qeverisë një sinjal mjaft të rëndësishëm për rikthimin e normalitetit, që gjithashtu pritet të injektojë një dozë të lartë besimi në popull dhe theksoi se edhe në kampionat janë kushtet që të hapen dyert e stadiumit për të paktën 1000 spektatorë, pa rrezikuar shëndetin e tyre.