10 ditë pushim për Partizanin. Pas përfundimit të aventurës Europiane që në raundin e parë, drejtuesit e klubit kanë vendosur t’i japin pak frymëmarrje skuadrës, duke i lejuar disa ditë pushim për të karikuar bateritë për sezonin e ri, që për të kuqtë nis në 19 gusht, me supersfidën ndaj Skënderbeut, që në javën e parë të kampionatit.
Lojtarët do të paraqiten në stërvitje në datën 30 korrik, ndërkohë që për drejtuesit puna vijon në kërkim të përforcimeve të nevojshme në merkato, për të vënë në dispozicion të trajnerit Skënder Gega një grup sa më cilësor, që të ketë mundësinë të realizojë objektivat madhorë të 15 herë kampionëve.
Partizani pritet të ketë përforcime pothuajse në të gjitha repartet në këtë etapë të dytë të merkatos, që do të jetë edhe më intensivja, ku të kuqtë do të kërkojnë të blindojnë disa role, ndërkohë që në paraqitjet e sezonit të kaluar, por edhe dy përballjet me Mariborin, në kampin e Partizanit është evidente mungesa e një qendërsulmuesi.
Malazezi Nikolic, i afruar para pak javësh, ende nuk ka mundur të lërë shenjë me paraqitjet e tij, ndërkohë që Edgar Çani mund të konsiderohet jashtë planeve për sezonin e ardhshëm, me situatën e tij që kërkon një zgjidhje, duke qenë se futbollisti ka edhe një vit kontratë, por është jashtë planeve sportive të trajnerit Gega.
