100 fitore së bashku. Atalanta ka nderuar me një postim në llogarinë e klubit në rrjetet sociale Berat Gjimshitin, mbrojtësin e kombëtares kuqezi për një arritje të veçantë, atë të fitores së 100-të me fanellën e bergamaskëve.
Shifër jubilare e arritur kjo nga Gjimshiti në takimin e kësaj mesjave në transfertën e Veronës. Një postim i thjeshtë por domethënës që vlerëson edhe kontributin e jashtëzakonshëm që Gjimshiti po jep në Serinë A, me Atalantën ku është padyshim një ndër lojtarët më të rëndësishëm në historinë e suksesit të klubit bergamask.
Lexo edhe:
- Ekskluzive/ E vërteta e dëmtimit të Uzunit, çlirohet Sylvinho!
- Lajm lehtësues nga Franca, lojtari i Nice shpëtohet nga zjarrfikësit
- “Berardi si Robben”, trajneri i Sassuolos “ngre në qiell” yllin e skuadrës
- Statistika e veçantë/ Burnley në krye, lë pas Arsenalin e Tottenhamin
Gjimshiti ka hyrë në sezonin e tij të 6-të me Atalantën skuadër ku u transferua në sezonin 2016-2017, dhe është shndërruar në një lider të skuadrës që në këto vitet e fundit ka surprizuar në luftën për zonën e lartë të klasifikimit, duke arritur të presë edhe biletën direkte për në grupet e Championsit, duke u renditur ndër 4 skuadrat më të mira të një prej kampionateve më të fortë në botë.
Rritja e jashtëzakonshme e Gjimshitit është reflektuar padyshim edhe në kombëtaren shqiptare, ku edhe pse u la jashtë grupit përfundimtar që garoi në Francë 2016, 30-vjeçari që nga ajo kohë ja njohur vetëm rritje duke u kthyer në një titullar të padiskutueshëm në qendrën e mbrojtjes së kombëtares, që edhe falë kontributit të tij është shumë pranë sigurimit për herë të dytë në finalet e një kampionati europian, ku nëse shkon Shqipëria, do të jetë pa asnjë dyshim edhe Gjimshiti!
