Feronikeli nuk i ndahet Prishtinës duke i ushtruar presion nga pas. Skuadra nga Drenasi u rikthye te fitorja në kampionat pasi mposhti 2-0 në Drenas, Ferizajn në sfidën që mbylli javën e 15-të të IPKO Superligës së Kosovës. Ishte një fitore nën shenjën e sulmuesve për skuadrën e Zekerija Ramadanit që më këtë sukses u ngjit në kuotën e 35 pikëve, 1 më pak se Prishtina kryesuese, duke lënë Ferizajn në vendin e parafundit në kuotën e 14 pikëve. Golat e Kastriot Rexhës dhe Artur Maganit në pjesën e parë vendosën fatet e sfidës me Feronikelin që la pas humbjen ndaj Prishtinës duke konfirmuar ambiciet për të luftuar deri në fund me kryeqytetasit për titullin kampion.