Java e 19-të e IPKO Superligës së Kosovës nisi me suksesin e Dritës në transfertë me shifrat 2-3 ndaj Vushtrisë, fitore që e ngjiti skuadrën nga Gjilani në vendin e parë në vendin e parë të renditjes në kuotë të barabartë pikësh me Ballkanin. Java e 19-të vazhdon këtë të shtunë me dy takime të tjera shumë interesante. Në orën 13:00 në Podujevë Llapi pret Feronikelin në një ndeshje ku skuadrës së Tahir Batatinës i bën punë vetëm fitorja nëse dëshiron të shpresojë ende te një nga 3 pozicionet e para që mund ta kualifikojë në Kupat e Europës. Feronikeli në krahun tjetër ka një mundësi edhe nga Digitalb Kupa e Kosovës pasi aktualisht ndodhet në gjysmëfinale. Një tjetër takim që do të luhet sot në orën 13:00 është ai mes Drenicës dhe Prishtinës, një sfidë që pritet të interes të madh pasi me një fitore Prishtina e Dallkut do t’i bashkangjitej përkohësisht Dritës dhe Ballkanit në krye të renditjes, edhe pse ndaj Drenicës misioni për të marrë tre pikët nuk do të jetë i thjeshtë për kryeqytetasit.
