Policia uruguaiane ka lëshuar nje urdhër arresti për mesfushorin e Cagliarit në Serinë A, Nahitan Nandez. Shkak është bërë një denoncim nga e dashura e tij për dhunë fizike e psikologjike, teksa forcat e policisë kanë zbarkuar menjëherë në shtëpinë e mesfushorit.
Megjithatë aty kanë gjetur vetëm mamanë e Nahitan Nandez, e cila u ka shpjeguar autoriteteve se mesfushori është nisur drejt Italisë, për t’u paraqitur në grumbullim me skuadrën e Cagliarit.
Mbetet ende e paqartë nëse urdhri i ndalimit ka vlerë vetëm brenda territorit të Uruguajit, apo është ndërkombëtar, pasi në rast të opsionit të dytë, Nandez mund të arrestohet edhe në Itali.
Mesfushori ishte në Uruguaj për Krishtlindje dhe më pas festoi edhe ditëlindjen e tij me familjarët, para se të kthehej në Itali, ku është vendosur menjëherë në izolim, pasi ka rezultuar pozitiv me koronavirus.