O pikë në 4 javët e fundit kanë vendosur në lëvizje drejtuesit e Luftëtarit, të cilët duken të pakënaqur nga rezultatet e skuadrës. Sigurisht që në një rast të tillë nuk mund të penalizohet grupi, me trajnerin që pritet të jetë i sakrifikuari. Kontrata e Milos Kostic me gjirokastritët është 3-vjeçare dhe nëse slloveni vijon të jetë ende në krye të skuadrës është pikërisht marrëveshja e firmosur mes palëve.
Në 4 javët e para Luftëtari ka treguar lojë të mirë por, thonë që rezultati është mbreti dhe këtu zikaltrit kanë çaluar. Në Kategorinë Supeiore nuk ndodhte që nga edicioni 2014-2015 që një skuadër të mos merrte asnjë pikë në 360 minutat e para të kampionatit. Luftëtari përsërit rekordin negativ të Elbasanit të atij sezoni. Pikërisht ecuria e dobët ka vënë në pikëpyetje pozicionin e Milos Kostic, me drejtuesit që kanë nisur sondazhin për t’i besuar stolin një trajneri vendas.
Për të dytin sezon radhazi opsioni i trajnerit të huaj ka rezultuar një zgjedhje e gabuar, pasi edhe vjet uruguaiani Luis Curbello u largua pas javës së 6-të, me Hasan Likën që mori drejtimin e skuadrës për të siguruar në fund pjesëmarrjen historike në kompeticionet e UEFA-s. Për momentin, emrat në tryezën e presidentit Grigor Tavo janë të shumtë, por së pari numri një i zikaltërve duhet të zgjidhë situatën me sllovenin Kostic, që mbetet i lidhur me klubin nga kontrata 3-vjeçare e firmosur në fillim të edicionit.
