Thyhet më në fund Bayerni i Mynihut! Pas 33 ndeshjes pa humbje në garat zyrtare (Bundesliga, Kupa e Gjermanisë, Champions League dhe Superkupa e Europës), kampionët e Gjermanisë u mposhtën thellë 4-1 nga Hoffenhemi. Për herë të fundit ishin gjunjëzuar në kampionatin gjerman përballë Borussias së Moenchengladbachut (2-1) më 7 dhjetor të vitit të kaluar.
Një performancë zhgënjyese kjo e të besuarve të trajnerit Hansi Flick, e kushtëzuar ndoshta edhe nga konsumimi fizik i pak ditëve më parë (24 shtator) në Superkupën e Europës përballë Sevillas (2-1), ku kampionëve të Bundesligës iu desh të qëndronin 120 minuta në fushë.
Sa i përket kronikës së ndeshjes së zhvilluar në PreZero Arena” (në Sinsheim), ku ishin të pranishëm mbi 6 000 tifozë, vendësit dominuan që në minutat e para, duke kaluar në epërsi të dyfishtë me golat e Bicakcic (16’) dhe Dabbur (24’), ndërsa Kimmich shkurtoi diferencën në 2-1 në minutën e 35-të.
Në pjesën e dytë reagimi i Bayernit ishte i dobët, madje Hoffenheimi realizoi edhe dy gola të tjerë me të njëjtin autor, Kramaric, në minutat 77’ dhe 90+2’, i fundit me 11-metërsh.
Me këtë fitore të madhe, Hoffenheimi ngjitet në krye të kampionatit me pikë të plota (6), ku bashkëkryeson me Augsburgun.