Ka ardhur edhe komunikata zyrtare e Olympiakos, në lidhje me shkarkimin nga posti i trajnerit, të Besnik Hasit dhe emërimin në këtë detyrë të Takis Lemonis. Ky i fundit ka nisur menjëherë nga puna, duke publikuar listën e futbollistëve që do të marrë me vete në Itali, ku të mërkurën në mbrëmje do të përballet me Juventusin, në ndeshjen e vlefshme për grupet e Champions League
57 vjeçari grek rikthehet për herë të tretë në krye të Olympiakos, pasi e ka drejtuar ekipin në periudhat 2000-2002 dhe 2006-2008 dhe në të gjitha rastet ka arritur të shpallet kampion. Ashtu si këtë sezon, edhe dy herët e tjera Lemonis e ka marrë drejtimin e skuadres greke, pasi kishte filluar kampionati, konkretisht në nëntor të vitit 2000 dhe në dhjetor të 2006-ës.
Vendimi për shkarkimin e Hasit erdhi të dielën në mbrëmje, pas humbjes së Olympiakos, në derbin ndaj AEK-ut, më rezultatin 3-2. Hasi e drejtoi klubin grek për më tepër se tre muaj dhe ia doli ta kualifikojë edhe në fazën e grupeve të Ligës së Kampionëve.
