Ka vetëm pak ditë që i është bashkuar skuadrës së tij të re, por duket se Kristal Abazaj e ka fituar pëlqimin e trajnerit të Anderlechtit, Hain Vanhazebrok i cili ka mbetur i surprizuar nga aftësitë e futbollistit të përfaqësueses shqiptare.
Ka lojtarë që e kanë të vështirë të integrohen në një skuadër të re, ku janë një sërë elementësh që mund të ndikojnë, si ndryshimi i qytetit apo format e reja të stërvitjes, por djaloshi nga Tropoja është përshtatur mjaft mirë me Brukselin dhe shokët e tij të skuadrës.
Këtë e konfirmon edhe vetë tekniku 54-vjeçar, i cili në një deklaratë për mediat, ka vlerësuar integrimin e shpejtë të futbollistit shqiptar.
“Kemi afruar disa lojtarë të rëndësishëm, një pjesë e tyre nuk e kanë pasur të thjeshtë ambientimin, ndërsa ka të tjerë si Abazaj, që është integruar plotësisht, madje duket sikur ka vite që luan me ne”, deklaroi trajneri i Anderlechtit.
Fjalë mjaft pozitive për anësorin, i cili realizoi edhe golin e tij të parë me fanellën e Anderlechtit, në miqësoren e fituar përballë PSV Eindhoven. Gjithçka ka nisur në mënyrën më të mirë të mundshme për Kristal Abazajn që vetëm pak ditë më parë festoi 22-vjetorin e lindjes.
