Me një gol në pjesën e parë, Tammy Abraham i dhuroi Romës biletën për në finalen e Conference League, që do të luhet pikërisht në Tiranë më 25 maj.
Sulmuesi anglez është një bast i fituar i Jose Mourinhos, që e kërkoi me ngulm verën e kaluar, ndërsa pas ndeshjes me Leicester nuk i fshehu emocionet, duke falënderuar tifozët verdhekuq për mbështetjen.
“Nuk kam fjalë për skuadrën dhe tifozërinë. Kur erdha këtu, thashë që dua të fitoj diçka dhe kemi arritur një finale historike, pas plot 31 vitesh. Tifozët më kanë dashur që kur kam ardhur këtu dhe nuk rresht së falënderuari. Sot e fituam ndeshjen pa zbritur ende në fushë, pikërisht falë tyre, që vazhdojnë të këndojnë edhe tani që ka mbaruar gjithçka. Në fund isha i shtrydhur, por pas vërshëllimës finale, nuk e di ku i gjeta forcat për të vrapuar e festuar”, tha Abraham.
