Ëndrra e Kosovës për të marrë pjesë për herë të parë në finalet e një Kampionati Europian, mori fund mbrëmjen e djeshme, teksa “Dardanët” u mposhtën me rezultatin 2-1 nga Maqedonia e Veriut në Play off-in e Nations League.
Zhgënjimi ishte oi madh si te futbollistët, ashtu edhe stafi teknik e tifozët, ndaj duke qenë se Kosova është e angazhuar edhe në edicionin aktual të Ligës së Kombeve, presidenti i FFK-së Agim Ademi e pa të arsyeshme të zhvillonte mbledhje me futbollistët dhe stafin teknik.
Kreu i FFK-së priti fillimisht futbollistët, të cilët i falënderoi për atë që dhanë mbrëmjen e djeshme dhe i inkurajoi që të jenë krenarë e të vijojnë të japin maksimumin për veten, por edhe për gjithë popullin e Kosovës.
Më pas Ademi priti edhe stafin teknik, me në krye trajnerin Bernard Challandes, të cilëve u konfirmoi mbështetjen e FFK-së për punën e bërë dhe u kërkoi të jenë më vigjilentë për të kaluar sa më shpejt këtë moment të vështirë.
Presidenti i Federatës së Kosovës nuk ngurroi të marrë në mbrojtje edhe futbollistët si Milot Rashica, Amir Rrahmani e Vedat Muriqi, të cilët nuk iu bashkuan Përfaqësueses për ndeshjen e djeshme.
Ademi falënderoi një sërë institucionesh që u përpoqën të mundësojnë grumbullimin e këtyre futbollistëve, por theksoi se ishte e pamundur, ndaj u kërkoi edhe tifozëve që t’i qëndrojnë pranë skuadrës e ta mbështesin duke nisur që nga ndeshja e datës 11 ndaj Sllovenisë.