Administratori i klubit të Vllaznisë, Astrit Gjyrezi ka qenë zyrtari i parë që ka folur pas largimit të trajnerit Armando Cungu, teksa ka shprehur vlerësimet maksimale për të.
“Cungu është një nga trajnerët më të mirë në Shqipëri dhe ne e vlerësojmë për punën që bëri te Vllaznia. Unë i uroj shumë suksese atij, kudo ku të vijojë karrierën e tij”, tha Gjyrezi.
Adiministratori i shkodranëve foli edhe për pasardhësin e Cungut, ish trajnerin kampion të Kukësit, Ernest Gjokën, që mbërriti dhe u prezantua sot në Shkodër.
“Ne sot prezantuam Gjokën dhe i urojmë suksese në punë dhe rezultate. Nuk kemi folur për objektiva, sepse duam t’i lëmë kohën e duhur atij. Ai është një trajner te i cili kemi besim të plotë dhe jam i sigurt që do të dalim nga kjo situatë. Jam i mendimit që, me përbërjen që kemi, nuk e meritojmë këtë pozicion të renditjes, ndaj pres të ngjitemi sa më shpejt”, tha Astrit Gjyrezi.