Kamza mori një fitore minimale, por shumë të rëndësishme, pasi tashmë është shumë pranë mbijetesës, kur kanë mbetur vetëm dy javë nga fundi i kampionatit. Trajneri Julian Ahmataj pranon rëndësinë e 3 pikëve, por bën thirrje për përqendrim, pasi nuk ka mbaruar ende asgjë.
Dy javë nga fundi, mbijetesa duket e arritur…
Që në fillim që kam ardhur te Kamza, e kam thënë që ekipi nuk duhet ta mendojë mbijetesën. E kam falënderuar dhe paraardhësin tim, për lojtarët e përzgjedhur dhe ambientin që kishte krijuar. Tani duhet t’i marrim ndeshjen një nga një, dhe të arrijmë rezultatet. Matematika na mban akoma në lojë, nuk kemi siguruar asgjë.
A e ndieni veten si hero i Kamzës, pasi e morët ekipin në një moment kritik?
Nuk jam unë heroi i Kamzës, janë futbollistët që luajnë në fushë. Një trajner mund të bëjë çdo gjë në stërvitje, por nëse lojtarët nuk i përgjigjen në fushë, nuk kam arritur asgjë. Dua të falënderoj sportistët për impenjimin maksimal deri sa të mbarojmë kampionatin.