Franca kaloi 3-1 pengesën Poloni dhe siguroi kalimin në çerekfinalet e Kupës së Botës. Oliver Giroud zhbllokoi takimin në fundin e pjesës së parë duke u kthyer në golashënuesin më të mirë të “Gjelave” me 52 gola, ndërkohë që në fraksionin e dytë të takimit erdhi dygolëshi i Kylian Mbappe.
Ylli i PSG-së kryeson renditjen e golashënuesve më të mirë në Katar 2022 me pesë gola në katër ndeshje, ndërkohë që Botërorin Rusi 2018 e mbylli me katër gola. Trajneri Didier Deschamps analizoi fitoren e djemve të tij dhe u ndal te forma fantastike e Mbappe, i cili shpreson të ngjitet sërish në majën e botës me Francën e tij.
“Nuk ishte e lehtë sepse skuadra polake ishte e organizuar dhe gati për të dyluftuar ndaj nesh, por u treguam të aftë për t’i mundur. Pastaj është Kylian, i cili ka aftësitë për të zgjidhur çdo problem. Sa mirë që e kemi në skuadër.
Rezultati 3-1 është fryt i punës së madhe që kemi zhvilluar dhe i unitetit të grupit. Është me të vërtetë një gëzim i përbashkët. Tani është koha për të kaluar disa momente me familjarët dhe të dashurit tanë”, deklaroi Deschamps.