Ajax merr fitoren e tretë radhazi në kampionatin holandez, pasi mposhti me rezultatin 2-1 Vitesse Arnhem në “Johan Cruijf Aena” dhe i bashkohet Herenveenit në krye të renditjes me 9 pikë të plota.
Skuadra nga Amsterdami e nisi mjaft mirë ndeshjen dhe kaloi në avantazh në minutën e 21-të me golin e shënuar nga Promes, por gjërat u komplikuan në fundin e pjesës së parë, pasi Alvarez u ndëshkua me karton të kuq për një shkelje të qëllimtë të kundërshtarit.
Vitesse gjeti golin e barazimit në minutën e 56-të me anë të Bazoer, ndërsa në minutën e 60’ në fushë zbriti edhe sulmuesi i Kombëtares Shqiptare Armando Broja, i cili mori pjesë në mënyrë aktive në lojë, por nuk arriti të lërë gjurmë.
Megjithatë në momentin më të mirë të miqve, ishte sërish Ajaxi që zbriti me shpejtësi në kundërsulm dhe arriti të shënojë golin e dytë me anë të Antony, duke mbrojtur më pas avantazhin dhe marrë një tjetër fitore me vlera.
