Pas seancës gjyqësore të zhvilluar ditën e enjte, lirimi me kusht për Mason Greenwood është zgjatur më tej, duke shtyrë kështu një vendim përfundimtar për të. Sulmuesi i Manchester United u arrestua nën akuzën për përdhunim, sulm dhe kërcënime për vrasje më 30 janar. 20-vjeçarit i është zgjatur lirimi me kusht ndërsa ende vazhdojnë hetimet për këtë çështje.
Anglezi mbetet i pezulluar nga United, me klubin që nuk do ta rikthejë sulmuesin pa përfunduar të gjitha procedurat hetimore.
“Pas një seance dëgjimore dje (e enjte 23 qershor 2022), një 20-vjeçar i arrestuar nën dyshimin për përdhunim, sulm dhe kërcënim për vrasje të dielën më 30 janar 2022 mbetet në lirim me kusht”,- thuhet në një deklaratë të policisë së Mançesterit, duke iu referuar, sipas raportimeve të medieve britanike, Mason Greenwood.
