Vazhdojnë “firot” e lojtarëve kryesore te Flamurtari për shkak të pagave të prapambetura. Pas Busicit dhe Danilo Alvesit, nga klubi vlonjat janë larguar edhe mbrojtësi Albi Alla e mesfushori Agustin Torrasa. Konfirmimi vjen nga vetë futbollistët në fjalë nëpërmjet postimeve në rrjetin social Instagram.
“Që sot nuk do të jem më pjesë e Flamurtarit. Falënderoj çunat e ekipit për këto 6 muaj të kaluara në mënyrë të shkëlqyeshme së bashku. Një grup shumë i fortë që do e mbaj mend gjatë. Falënderoj drejtuesit e klubit për mirëkuptimin dhe presidentin Sinan Idrizi për mbështetjen e tij në lidhje që karriera ime futbollistike të ecë përpara dhe duke mos më krijuar asnjë lloj pengese. Do t’ju jem gjithnjë mirënjohës, qytetit të Vlorës dhe “Flotës”, shkruan mbrojtësi.
Edhe Torasa ka falënderuar grupin e lojtarëve me një postim të shkurtër për aventurën e tij te Flamurtari. Dy futbollistët pritet që karrierën e tyre ta vazhdojnë në kampionatin kinez ku kanë pasur ofertë nga një skuadër e kategorisë së dytë.
