Në kompeticione të tilla kaq të rëndësishme si Champions League nuk vlen loja e bukur por kualifikimi i skuadrës duke dalë kundër idesë së presidentit Safet Gjici. Albi Alla nuk fshihet kur deklaron se objektivi i Kukësit ishte të kalonte maltezët e Vallettas dhe jo të bënte një figurë të mirë në atë përballje të dyfishtë siç ndodhi me Sherifin e Tiraspolit një vit më parë dhe në fund verilindorët u eliminuan nga Championsi.
Tashmë vështirësia bëhet më e madhe pasi Kukësi do të sfidojë një skuadër të madhe si Qarabagu që vitin e kaluar arriti deri në fazën e grupeve të këtij kompeticioni por Alla thekson se verilindorët do të luajnë për fitore edhe ndaj kampionëve të Azerbajxhanit ndërsa shton se është i gatshëm për të dhënë gjithmonë maksimumin sa herë që trajneri do të ketë nevojë për të.