Juventus po kalon një periudhë të dobët nën drejtimin e Massimiliano Allegri. “Zonja e vjetër” pësoi një tjetër humbje surprizë në kampionat, përballë Monzës që shkroi historinë me arritjen e fitores së parë në elitën e futbollit italian.
Presioni është rritur te Allegri, i cili nuk ka më as mbështetjen e lojtarëve dhe një shkarkim i tij nga posti i trajnerit mund të ndodhë nga momenti në moment.
Mediat angleze dhe ato italiane kanë raportuar se te Juventus mund të ndodh një tjetër rikthim i madh, pasi ekzistojnë disa spekulime në lidhje me një kalim të mundshëm të Antonio Conte në Torino.
53-vjeçari është në krye të Tottenham që prej vitit 2021 dhe kontrata e tij përfundon në fundin e sezonit që sapo ka nisur. Drejtuesit e “Spurs” ende nuk i kanë ofruar rinovimin e kontratës trajnerit italian dhe për këtë arsye po flitet gjithnjë e më shumë për një rikthim të Contes te Juventus.
Italiani i drejtoi “bardhezinjtë” për 3 sezone nga viti 2011 deri në 2014 dhe arriti të fitonte tre kampionate të Seria A, megjithatë ai u largua për shkak të përplasjes që pati me presidentin Agnelli në lidhje me transferimet në merkaton verore.
Conte ka deklaruar se është i lumtur te Totteham dhe se është i hapur për të zgjatur bashkëpunimin, por një rikthim në vendin e lindjes mund ta tundoj italianin, i cili për dy sezone ka drejtuar edhe Interin, ku 53-vjeçari arriti një tjetër sukses të madh me fitimin e titullit të Seria A me zikaltrit.