Klaus Gjasula është padyshim një nga futbollistët që ka marrë më shumë minuta në këto javë të para të sezonit të ri futbollistik, plot 772 të tilla, ndaj ky është vërtetë një lajm i mirë për trajnerin Edi Reja, në prag të dy ndeshjeve të fundit të Ligës së Kombeve.
Mesfushori është një titullar i formacionit të kuqezinjve, teksa interesante është që në këtë fillim sezoni ka luajtur më së shumti në qendër të mbrojtjes, në një rreshtim 3-5-2, ashtu siç luan edhe Kombëtarja Shqiptare.
E pikërisht në një moment kur mungojnë emra si Kumbulla, Gjimshiti e Dermaku, nuk përjashtohet mundësia që edhe Reja ta shohë Gjasulën si një zgjidhje për treshen e prapavijës, duke i besuar eksperiencës dhe formës së mirë që po kalon.