Sulmuesi i kombëtares shqiptare, Myrto Uzuni, ka pasur një nisje sezoni shumë të mirë me Granada-n në La Liga 2.
Emisioni më i ri në “Super Sport”, “Analizë KUQEZI” është marrë me analizimin e formës së sulmuesit, i cili duket se është në një nga momentet më të mira të tija.
Në katër ndeshjet e para të zhvilluara në kampionat, 27-vjeçari ka realizuar 4 gola, duke qenë lojtari më në formë i kësaj skuadre dhe është shpallur lojtari i muajit gusht në La Liga 2.
Ndërsa sa i përket goditjeve në portë, Uzuni ka realizuar saktë 50% të tyre, pra gjysmën e goditjeve, teksa sa i përket pasimeve ai është treguar i saktë në 87% prej tyre.
Mbrëmjen e kësaj të hëne Granada do të zhvillojë takimin e raundit të 5 të La Liga 2, kundër Eibar dhe Uzuni pritet të jetë titullar.