Partizani ka zhvilluar një fazë të parë shumë të mirë. “Demat” kryesojnë kampionatin shqiptar me 19 pikë, katër më shumë se ndjekësit Erzeni&Tirana.
Ekipi i kuq ka pësuar vetëm shtatë gola në nëntë ndeshjet e para, statistikë ku ka dhënë kontributin e tij edhe Eneo Bitri, një nga lojtarët e ftuar nga Edi Reja për miqësoren e 26 tetorit ndaj Arabisë Saudite.
Emisioni “Analizë KUQ E ZI”, që transmetohet çdo të hënë (18:00) në Sport News nën drejtimin e Sokol Xhihanit dhe Fation Bardhit, ka publikuar statistikat e 26-vjeçarit të skuadrës kryeqytetase.
26-vjeçari ka shënuar një gol, ka realizuar me sukses 86% të aksioneve në të cilat ka marrë pjesë, ndërkohë që ka fituar 74% të dueleve ndaj lojtarëve kundërshtarë. Bitri është i fortë edhe në luftën në ajër falë shtat lartësisë së tij, duke fituar 78% të dueleve ajrore.