Vllaznia nuk hasi shumë probleme përballë Kastriotit, rival të cilin e mposhti 3-1 fundjavën e kaluar. Fitorja e tretë sezonale në Abissnet Superiore për ekipin shkodran dhe vendi i tretë në renditje me 7 pikë më pak se Tirana kryesuese.
Ardit Hoxhaj ishte protagonist i suksesit të fundit të kuqebluve të Brdaric me 2 gola dhe 1 asist. Golat e parë në këtë kampionat për Hoxhajn, i cili sezonin e kaluar realizoi 12 gola në Superiore me Vllazninë.
Me të drejtë, 27-vjeçari vlonjat është përzgjedhur lojtari më i mirë i ndeshjes Vllaznia-Kastrioti në emisionin “Analizë Superiore” në Supersport, nën drejtimin e Sokol Xhihanit dhe Fation Bardhit, videoanalist i kombëtares U19, që nxjerr statistika dhe detaje interesante të asaj çfarë ndodh në futbollin tonë.
Përveç golave dhe asistit të dhuruar për kroatin Aralica që zhbllokoi rezultatin, Hoxhaj u shfaq problematik për mbrojtjen krutane në krahun e djathtë. Lojtari ofensiv tentoi 4 driblime, nga të cilat 3 i realizoi me sukses.