Partizani nuk ia doli të merrte pikë nga transfertë në Kamzë përballë Kastriotit. Të kuqtë u mposhtën me rezultatin 0-1, teksa e pësuan nga sulmuesi Kaina Nunez. Por, në radhët e krutanëve nuk dalloi vetëm braziliani që shënoi golin, por edhe mesfushori Abaz Karakaçi.
Madje, në bazë të statistikave të publikuara në emisionin Analizë Superiore nën drejtimin e Sokol Xhihanit dhe me pjesëmarrjen e videonalistit të kombëtares U19, Fatjon Bardhi, mesfushori rezulton edhe si lojtari më i mirë i ndeshjes.
29-vjeçari është konfirmuar një “busull” për Kastriotin në mesfushë duke qenë se ka realizuar saktësisht 74% të pasimeve, ndërsa ka fituar 18 duele ndaj kundërshtarëve. Sakaq, për t’u përmendur edhe fakti që Karakaçi rikuperoi 16 herë topin, nga të cilat 8 ishin në gjysmëfushën kundërshtare.
