Tirana apeloi në Komisionin e Apelit, vendimin e Disiplinës për të reduktuar numrin e ndeshjeve pa tifozë, por kjo kërkesë e klubit bardheblu është hedhur poshtë.
Klubi bardheblu u dënuar me luajtjen e 4 ndeshjeve pa tifozë, pas incidenteve të ndodhura në sfidën Tirana-Laçi dhe në Apel ka kërkuar përgjysmimin e dënimit, duke vënë në dispozicion edhe provat televizive, por edhe precedentë me klube të tjera, që ia kanë hedhur paq me vetëm një gjobë disa-milionëshe.
Megjithatë Komisioni i Apelit ka vendosur të lërë në fuqi të njëjtën masë ndëshkimore për klubin bardheblu, pra zhvillimin e 4 ndeshjeve pa tifozë.
Ky vendim ka shkaktuar edhe indinjatën e klubit të Tiranës, që po sot u njoh edhe me refuzimin e reduktimit të pezullimit të sulmuesit anglez Michael Ngoo.
Në reagimin zyrtar, klubi bardheblu thekson se i njëjti komision, përdor standarde të ndryshme, për klube të ndryshme, pasi për të njëjtat ndodhi, klubet e tjera kanë paguar vetëm dy milionë lekë gjobë.