Nis me rezultatit surprizë sezoni i ri i Superligës së Kosovës. Në ndeshjen hapëse të edicionit 2020-2021, skuadra e sapongjitur në elitë, Arbëria, befasoi Trepçën ’89 në “Riza Lushta” me rezultatin 0-2.
Ekipi nga Dobraja e Madhe, i drejtuar nga Arbnor Morina, shënoi nga një gol në çdo pjesë, duke e nisur në mënyrë fantastike kampionatin. Autorë të golave ishin Kreshnik Bahtiri dhe Agron Llugiqi.
Nuk e kishte menduar këtë start Trepça ’89, e drejtuar nga Shpëtim Idrizi, që ndoshta edhe në këtë sezon të ri duhet të mendojë më shumë për qëndrimin në elitë sesa për pjesën e sipërme të tabelës.
Ndërkohë, Komisioni i Garave në Federatën e futbollit të Kosovës ka pranuar kërkesën e Dritës së Gjilanit për t’ia shtyrë dy ndeshjet e para të kampionatit, pasi kampionia në fuqi kërkon të jetë e fokusuar te ndeshje e raundit të tretë kualifikues të Europa League-s përballë Legias së Varshavës.