Argjentina mundi Nigerinë, duke siguruar kalimin për në fazën e mëtejshme, të kampionatit botëror të basketbollit për meshkuj. Në Wuhan skuadra e drejtuar nga trajneri Sergio Hernandez regjistroi edhe fitoren e dytë, duke mposhtur një rival të drejtpërdrejtë, për të siguruar në këtë mënyrë edhe kualifikimin për në raundin tjetër, që do të zhvillohet sërish me fazë grupesh. Pas suksesit 95-69 në ndeshjen hapëse ndaj Koresë së Jugut, Argjentina mposhti gjithashtu edhe Nigerinë 94-81, ndërkaq ekipi afrikan e mbylli çështjen e kualifikimit që në fazën hapëse, duke patur parasysh që skuadra e drejtuar nga Alexander Nwora u mund me pesë pikë diferencë në takimin e parë me Rusinë. Veterani Luis Scola që luan në Kinë me Shanghai Sharks, udhëhoqi skuadrën drejt një fitoreje tepër të rëndësishme dhe kapiteni e përfundoi takimin me plot 23 pikë e 10 rebound. 39-vjecari nga Buenos Airesi falë eksperiencës së tij kontribuoi në shkëputjen e parë të rëndësishme të skuadrës argjentinase, që e mbylli periodën hapëse me epërsinë e 11 pikëve.
Në 10 minutëshin e dytë Nigeria përforcoi ndjeshëm mbrojtjen dhe e shtrëngoi ekipin latino – amerikan në vetëm 15 pikë. Skuadra afrikane madje në një moment kryesoi me 4 pikë më shumë, gjithsesi dy ekipet shkuan në intervalin mes pjesëve në ekuilibër të plotë 43-43. Në pjesën e dytë basketbollistët e Nigerisë bënë shumë gabime dhe vuajtën si zakonisht egoizmin e tepruar, ndërsa lojtarët argjentinas në krahun tjetër falë lojës kolektive krijuan shkëputjen e duhur, që iu mundësoi edhe fitimin e takimit. Argjentina hyri në periodën përmbyllëse me epërsinë 72-61 dhe në vazhdim skuadra nga Amerika e Jugut administroi me qetësi avantazhin, madje në 10 sekondat e fundit lojtari i Realit të Madridit Facundo Campazzo realizoi edhe dy herë për 3 nga jashtë harkut, për të vulosur përfundimisht fitoren me 13 pikë diferencë. Kapiteni Luis Scola që merr pjesë për herë të pestë në fazën finale të një Botërori, e mbylli takimin me double double në 32 minutat që qëndroi në parket.
Patricio Garino kontribuoi me 17 pikë e 7 topa në tabelë, ndërsa Campazzo e përfundoi ndeshjen me 14 pikë dhe plot 8 asist. Në radhët e Nigerisë spikati 20-vjecari i franchise-t amerikan Minessota Timberwolves Josh Okogie, me 18 pikë e 5 asist. Ditën e mërkurë Argjentina do të përballet me Rusinë, në një duel të drejtpërdrejtë për vendin e parë në Grupin B, ndërsa Nigeria do të masë forcat me skuadrën përfaqësuese të Koresë së Jugut, me objektivin e qartë për të shmangur vendin e fundit në këtë grup.