Marco Arnautovic vijon përgatitjet me përfaqësuesen austriake, në kuadër të ndeshjes së fazës së 1/8-ave ku do të gjejnë përballë Italinë, vend në të cilin pritet të rikthehet gjatë verës, për të vijuar karrierën e tij si futbollist.
Sulmuesi 32-vjeçar është në fazë negociatash për prishjen e kontratës me kinezët e Shanghai SIPG dhe gjasat janë që të transferohet te Bologna, ku kërkohet me ngulm nga trajneri serb Sinisa Mihajlovic.
Mediat në Itali raportojnë se emilianët kanë një para-kontratë me sulmuesin austriak dhe pritet të bëjnë zyrtarizimin menjëherë pas përfundimit të Europianit, ndërsa te Bologna Arnautoviç pritet të marrë vendin e Rodrigo Palacios, që është me valixhe gati për t’u larguar.
Me Bolognën sulmuesi pritet të nënshkruajë një kontratë 3-vjeçare me pagë 2.7 milionë euro në sezon, ndërsa vlen të theksohet se Arnautovic ka qenë edhe më parë pjesë e Serisë A, pasi ka veshur fanellën e Interit në sezonin 2009-2010.