Barazimi “in extremis” përballë Flamurtarit dhe pauza e kampionatit erdhën në çastin e duhur për Kamzën. Skuadra po kalonte një periudhë negative dhe të paktën në aspektin psikologjik duket se gjithçka ka marrë formën e duhur. Në analizën e tij mbrojtësi Bruno Arrabal evidenton vetëm një problem, mungesën e fatit.
“Situata është pozitive sepse skuadra vjen nga një lojë e mirë, nuk kemi pasur shumë fat përsa i përket rezultateve, por në fushë kemi treguar që mund të luajmë si të barabartë me këdo kundërshtar. Shpresoj që duke filluar nga ndeshja e rradhës përveç lojës të na vijnë edhe rezultatet. E ndjej që po përmirësohemi ndeshje pas ndeshje, por tashmë na duhen pikët”
Skënderbeu nuk është kundërshtari më i mirë i mundshëm, megjithatë braziliani nuk është gati të nënshkruajë një kontratë me shënjën “X”.
“Do të shkojmë në Korçë për ta fituar takimin, patjetër që do të jetë një sfidë e vështirë, gjithsesi shpresojmë të marrim një rezulltat pozitiv. Skënderbeu është një skuadër e fortë, por po e përsëris ne kemi lujatur mirë vetëm fati na ka munguar dhe 3 pikët janë objektivi ynë në këtë duel.”
Pavarësisht se aktualisht Kamza ka koleksionuar vetëm 7 pikë në 8 ndeshjet e para, shënjestra përfundimtare nuk ka ndryshuar drejtim, lojtarët kërkojnë pjesmarrjen në Europë.
“Besoj se mund të synojmë Europën. Kampionati është i gjatë ka ende shumë ndeshje deri në fund dhe jam i bindur që mund të bëjmë një kampionat të mirë dhe në fund ta realizojmë këtë objektiv.”
Sezonin e shkuar Arrabal u aktivizua kryesisht në të majtë të mesfushës ndërsa në këtë edicion është vendosur në qëndër të mbrojtjes, megjithatë 26-vjeçari nuk shfaq asnjë shenjë pakënaqësie.
“Unë luaj në dy pozicione. Trajneri ka vendosur që unë të aktivizohem në qëndër të mbrojtjes. Nuk e kam aspak problem, për mua është e njëjta gjë, mjafton që të ndihmoj skuadrën”.
Kamza po vijon përgatitjet në prag të duelit me Skënderbeun që do të luhet ditën e dielë. Ne seancën e fundit nuk ka qënë i pranishëm Argjend Malaj i cili po vuan nga një dëmtim në gju, prania e tij ndaj bardhekuqve është në dyshim serioz.
