Artan Mërgjyshi nuk humbet kohë dhe zbret menjëherë në fushë duke iu prezantuar ekipit në këtë aventurë të re në drejtimin e Laçit. Kurbinasit të cilët kishin mbetur pa timonier pas largimit të Besnik Prengës në përfundim të aventurës europiane, që rezultoi me kualifikimin historik të turit të parë, tashmë kanë trajnerin e ri i cili duhet të nisë nga puna me fitimin e një trofeu, Superkupën e Shqipërisë. Dueli i së dielës në Selman Stërmasi ndaj Skënderbeut është testi i parë për ish trajnerin e Dinamos, që rikthehet të drejtojë një skuadër që nga sezoni 2016-2017 kur ishte në krye të debutuesve të Korabit. Nën urdhërat e tij janë paraqitur të gjithë lojtarët nën kontratë, duke filluar me portierin dhe kapitenin Gentjan Selmani deri tek heroi i verës europiane Myrto Uzuni. Pas fjalimit të prezantimit 50-vjeçari ka kaluar menjëherë tek ushtrimet, ku ka dashur të shohë nga afër futbollistët që ka në dispozicion për të krijuar idenë e formacionit që duhet të hedhë të dielën në fushë. Koha e pregatitjeve është e shkurtër, edhe pse Laçi është në gjendje perfekte në aspektin fizik, por përshtatja e trajnerit të ri me lojtarët është një proces që kërkon kohën e vetë.