Arturo Vidal nuk do të shitet tek Interi. Kështu pretendon e përditshmja katalane “Sport”, sipas së cilës trajneri i ri, Quique Setien, ka bërë të qarta piketat e merkatos me drejtuesit e Barcelonës, duke vënë veton ndaj shitjes së kilianit. Përveç Todibo-së, i destinuar për Schalke 04, nuk do të ketë largime në shtëpinë “blaugrana”.
Setien, ndërkohë, nuk përjashton hipotezën e blerjes së një sulmuesi për të përballuar mungesën e Luis Suarezit, që do të jetë jashtë fushave për 4 muaj.
Siç parashikohej, shkarkimi i Valverdes ka komplikuar planet e Interit, që ëndërronte t’ia dhuronte Contes të preferuarin e tij Vidal. Kiliani, në fakt, ishte në raport të kompromentuar me Valverden, por tani te Barcelona nis një epokë e re dhe Setien ka besim tek ai. Trajneri ka ndaluar shitjen e tij ashtu si të çdo lojtari tjetër në organikën aktuale.
Në Katalunjë janë të predispozuar për të bërë një sforco vetëm për një sulmues të ri, duke parë dëmtimin e rëndë të Suarezit, por pa nxitim dhe mbi të gjitha pa bërë çmenduri. Gabimi i vitit të kaluar me marrjen në huazim nga Sassuolo të Kevin-Prince Boateng është ende i freskët në mendjen e drejtuesve “blaugrana”, që nuk duan të blejnë sa për numër.
Me Dembelenë drejt rikuperimit (francezi do të rikthehet në dispozicion pas 3 javësh), Setien mund të mbështetet edhe te Messi, Griezman dhe të rinjtë Ansu Fati e Carles Perez, pa harruar që edhe Sergi Roberto dhe vetë Vidal mund të luajnë më të avancuar.
