Prej disa sezonesh luan në nivele të larta në kampionatin italian dhe për të dytin vit me radhë janë pjesë e Ligës së Kampionëve, ndaj te Atalanta kanë filluar të shohin lart dhe të mendojnë për të rritur edhe më shumë cilësinë e e skuadrës.
Pikërisht për këtë arsye kanë nisur negociatat me Romën për të transferuar fantazistin turk Cengiz Under, i cili pas një shpërthimi fillestar te verdhekuqtë, nuk po gjen hapësirat e nevojshme me trajnerin Fonseca në pankinë.
Roma kërkon të paktën 30 milionë euro për kartonin e turkut, ndërsa Atalanta ka ofruar 15 milionë euro dhe kartonin e Josip Iliçiç, sulmues ky mjaft i preferuar në kryeqytetin italian, pavarësisht 32 viteve mbi supe.
Marrëdhëniet mes dy klubeve janë të shkëlqyera dhe mjafton të shohësh që në sezonet e fundit të merkatos Roma ka transferuar tre futbollistë nga Atalanta, mesfushorin Brian Cristante dhe mbrojtësit Mancini e Ibanez.
