Sezonin e kaluar ishte skuadra që shënoi më shumë gola në kampionatin italian, plot 98 të tillë, ndërsa edhe këtë vit Atalanta e nisi vrullshëm, duke shënuar 4 herë në ndeshjen e javës së dytë dhe duke triumfuar 2-4 në transfertën ndaj Torinos.
Zikaltrit nuk luajtën në javën e parë dhe kjo ishte performanca e parë zyrtare për këtë sezon, teksa transferta ndaj skuadrës ‘granata” rezultoi shumë më e lehtë nga sa ishte parashikuar për “djemtë e Gasperinit”.
Andrea Belotti zhbllokoi sfidën në minutën e 11’, por Atalanta mori kontrollin e lojës dhe riktheu baraspeshën vetëm dy minuta më vonë me golin e kapitenit Alejandro Gomes, i cili shënoi pas një asisti të Duvan Zapatës.
Më pas ishin Luis Muriel dhe Hans Hateboer që shënuan në portën e Torinos, duke çuar shifrat në 1-3 për Atalantën, që ishte zot në fushë dhe kontrollonte lojën. Gjithsesi në minutat e fundit të pjesës së parë Belotti shënoi sërish, këtë herë me asist të Mërgim Vojvodës dhe provoi të rihapë takimin.
Megjithatë llogaritë i mbylli Marten De Roon në fillim të pjesës së dytë, teksa mposhti për herë të katërt portierin Sirigu dhe vulosi rezultatin e sfidës, ndonëse deri në fund zikaltrit mund të kishin shënuar edhe më tepër.
