Atalanta konfirmohet sërish si një nga pretendentet për zonën Champions të renditjes, teksa tre ditë pas triumfit në “Olimpico” përballë Romës, ia doli të triumfojë edhe në transfertën e radhës mbrëmjen e sotme, me rezultatin e thellë 1-4 ndaj Sassuolos.
Të ambientuar me terrenin e “Mapei Stadium” të cilin e përdorën thuajse gjatë gjithë sezonit të kaluar, zikaltrit e Gasperinit zgjidhën gjithçka brenda 35 minutave, duke arritur të shënojnë plot 4 herë në portën e vendasve.
Kapiteni Papu Gomez zhbllokoi shifrat në minutën e gjashtë të takimit, ndërsa më pas ishte Gosens që dyfishoi shifrat në të 13-ën. Në minutën e 29’ argjentinasi Gomez shënoi golin e dytë personal dhe të tretin për Atalantën, ndërsa kolumbiani Zapata “vrau” ndeshjen në minutën e 35-të.
Sassuolo e pati të pamundur të reagojë në pjesën e parë, por u shfaq disi më ndryshe në 45 minutat e dyta, ndonëse goli i shënuar nga Defrel në minutën e 63-të, shërbeu vetëm për kënaqësinë personale të francezit, pasi takimi nuk mund të rihapej më.
Kjo ishte fitorja e katërt sezonale për Atalantën, njëkohësisht e katërta në transfertë, ku djemtë e Gasperinit nuk kanë gabuar asgjë, ndryshe nga ndeshjet pritëse, ku kanë regjistruar një barazim dhe një humbje.
Me këtë triumf, Atalanta ngjitet në vendin e tretë me 13 pikë, duke lënë pas Napolin, që luan nesër ndeshjen e javës së 6, ndërsa Sassuolo konfirmon vështirësitë, me vetëm 6 pikë në 6 javët e para.