Bashkë me trajnerin Skënder Gega në konferncën për shtyp të Partizanit përpara sfidës ndaj Teutës ishte edhe nigeriani Sodiq Atanda i cili është një nga lojtarët me më shumë eksperiencë në skuadër, pasi ka disa vite që luan për të kuqtë. Atanda i cili me dëmtimin e Ardit Hilës, është aktivizuar më shumë në mesfushë sesa në mbrojtje nga trajneri Gega, foli për pozicionin e tij në fushë, për shtimin e konkurencës në prapavijë me afrimin e Lum Rexhepit, por edhe për sfidën e rradhës.
Ku ndjeheni më mirë në mbrojtje, apo mesfushë?
– Në mbrojtje ndihem më mirë. Mesfusha nuk është pozicioni im, por di të markoj e të marr pjesë në manovrat e lojës.
Cila është pika më e fortë e Teutës?
– Mendoj se janë shumë mirë në sulm, por ne duhet të jemi 100% të përqendruar. I gjithë sulmi i Teutës është i rrezikshëm, por duhet të jemi të përqendruar. Latifi është një sulmues i mirë dhe sulmuesi i krahut të majtë. Them se duhet të fokusohemi tek ai krah më shumë.
Afrimi i Rexhepit ka rritur konkurrencën, si ndiheni në lidhje me këtë?
– Është lojtar i mirë, por i duhet më shumë kohë për t’u përshtatur. Më pëlqen të kem sa më shumë konkurrencë. I pranoj sfidat dhe mendoj se të ndihmojnë. Futbolli është lojë shansesh, kush e kap shansin qëndron në formacion.
Teuta ka dy sulmues të gjatë, ndiheni mirë në qendër të mbrojtjes, apo para? Preferoni Latif?
– Po punojmë në stërvitje për këtë. Nuk e kam problem, në qendër të mbrojtjes jam mirë. Si Latif, si Busic, për mua nuk bëjnë problem.
Si është atmosfera brenda ekipit?
– Ne jemi të përqendruar dhe nuk duhet të gabojmë, pasi kemi shumë pikë në lojë dhe nuk duhet të gaboni.
A mendoni se ky është Partizani më i fortë?
– Po bëjmë mirë dhe marrim rezultate. Mendoj se kjo është skuadra më e mirë që “Demat” kanë pasur.
Kush është sulmuesi më i fortë që jeni përballur?
– Për mendimin tim Sowe. Ai ishte afrikan dhe i di cilësitë e tyre.
