Alexander Zverev siguroi arritjen më të madhe në karrierë, teksa fitoi titullin përmbyllës të sezonit, ATP World Tour Finals, duke mposhtur në finale numrin 1 të botës Novak Djokoviç. 31-vjeçari serb që kishte regjistruar 14 fitore radhazi ndaj tenistëve të dhjetëshes së parë në rruzull u mund në vetëm dy sete dhe Sascha u bë kështu i pari tenist gjerman që triumfon në një aktivitet të tillë, që nga koha e Boris Becker-it, 23 vjet më parë.
Që në shkëmbimet e para 21-vjeçari nga Hamburgu nuk tregoi aspak shenja frike, duke sulmuar vazhdimisht 5 herë fituesin e këtij kompeticioni. Nole e kishte mposhtur dy herë në harkun e vetëm një muaji tenistin me origjinë ruse, madje për herë të fundit ditën e mërkurë, ku për hir të së vërtetës Djokoviç fitoi setin hapës, ndonëse regjistroi vetëm tre goditje fituese gjithsej, për më tepër duke i anuluar dy mundësi për break numrit 5 të botës. Ashtu si në fazën e grupeve edhe këtë radhë tenisti serb u tregua vërtet shumë pasiv në lojë, duke e mbyllur setin e parë me vetëm katër goditje fituese, por krejt ndryshe nga ç’ndodhi në atë duel këtë herë Sascha nuk u impresionua aspak dhe ruajti qetësinë e nevojshme pikërisht në pikët më të rëndësishme.
Për rrjedhojë Alexander Zverev përfitoi nga mënyra e lojës që kishte përzgjedhur Djokovic si dhe gabimet e shumta të numrit 1 të botës, për ta ndëshkuar Nolen plot tre herë radhazi në servis. Në fakt pasi humbi setin e parë dhe u thye në shërbim që në game-n hapës të setit pasardhës Djokoviç reagoi me një kundër-break, megjithatë ishte thjesht një shkëndijë, që erdhi si rezultat i dy gabimeve në shërbim të tenistit gjerman. Me shumë personalitet Zverev jo vetëm që administroi më së miri epërsinë e krijuar por gjithashtu e theu me break edhe në game-n e fundit, për të mbyllur gjithë takimin me rezultatin e thellë 6-4, 6-3, në vetëm 80′ lojë.
Djokoviç që u paraqit në finale pas 35 fitoreve në 37 ndeshjet e fundit, gjatë gjithë javës në O2 Arena jo vetëm që nuk kishte humbur asnjë set, por gjithashtu krenohej me plot 36 turne rresht pa u thyer në servis, gjithsesi Sascha ia rrëmbeu shërbimet katër herë, duke dominuar shkëmbimet për pjesën më të madhe të kohës. Kështu Zverev barazoi bilancin ndërmjet tyre në 2-2 dhe duke llogaritur edhe dy fitoret në fazën e grupeve përfitoi nga turneu përmbyllës i tetë tenistëve më të mirë të sezonit një cek të majmë prej plot 2,5 milionë dollarësh, pa harruar edhe 1.300 pikët e grumbulluara që e ngjisin tenistin nga Hamburgu sërish në vendin e katërt, pozicion ku në fakt përfundoi edhe sezonin e vitit 2017.
Një meritë e padiskutueshme si në aspektin taktik ashtu edhe në atë psikologjik natyrisht i takon trajnerit nga Çekosllovakia e dikurshme Ivan Lendl, 5 herë fitues i këtij turneu njësoj si Djokoviç dhe Pete Sampras, më saktë ish-trajnerit të Murray-t, të cilin Zverev e afroi në staf që në muajin gusht, për të patur sukses në turnetë Slam.
Për Sascha-n ky ishte titulli i katërt sezonal, pas turneve të fituar në Munich, Madrid dhe Washington, vit të cilin tenisti gjerman e mbylli me më shumë fitore se çdo tenist tjetër, 58, ndërkaq për Nolen kjo ishte humbja e dytë në harkun e vetëm dy javëve, pas disfatës së pësuar në finalen e Mastersit të Parisit me 22-vjeçarin moskovit Karen Khachanov, gjithsesi Djokoviç që në muajin qershor ra deri në vendin e 22 në klasifikimin e përgjithshëm tashmë krenohet të paktën me mbylljen e sezonit në vendin e parë në renditjen botërore, arritje të cilën tenisti nga Serbia e siguron për herë të pestë në karrierë.