Piero Ausilio ka reaguar pas deklaratave të bëra nga Wanda Nara, bashkëshortja dhe menaxherja e kapitenit të Interit, Mauro Icardi, në studion e emisionit sportiv “Tiki Taka”, ku modelja është edhe e ftuar e përhershme.
Drejtori Sportiv i zikaltërve mohoi tërësisht deklaratat e Wandës, se Interi ka tentuar të shesë Mauron te Juventusi, duke theksuar se palët nuk kanë qenë asnjëherë afër njëra-tjetrës, ndërsa u shpreh se po punon për rinovimin me sulmuesin argjentinas.
“Deklaratat e Wandës janë folkloristike, pasi po të ishte edhe Marotta, mund të konfirmonim të dy se Mauro dhe Juve nuk kanë qenë kurrë pranë. Ne jemi shumë të kënaqur me Icardin, si me performancën, ashtu edhe me lidershipin e tij, ndaj punojmë çdo ditë për të rinovuar. Kemi bërë një ofertë dy muaj më herët, që e ka refuzuar dhe tashmë po mendojmë për ofertën e radhës, por gjithçka në kohën e duhur”, deklaroi Ausilio.
Sa i përket merkatos së janarit, Ausilio theksoi se nuk priten gjëra të mëdha, pasi zikaltrit besojnë te organika që kanë në dispozicion, ndërsa dha një përgjigje zyrtare edhe mbi të ardhmen e Gabigolit.
“Në janar nuk priten gjëra të mëdha, pasi kemi një organikë të pasur, që mund të luftojë për synimet tona. Gabigolit i kemi thënë që këtu nuk ka hapësira, ndaj do të gjejmë zgjedhjen më të mirë për të, qoftë në Europë, qoftë në Brazil”, tha Ausilio.