Sfida mes Lazios dhe Torinos, e programuar për nesër në orën 18:30, duket se do të shtyhet dhe këtë e ka pranuar kreu i Ligës së Serisë A, Paolo Dal Pino. Shkak janë bërë disa të infektuar në kampin e Torinos, 8 prej të cilëve futbollistë të skuadrës.
Zyra Lokale Shëndetësore e Torinos ka vendosur karantinim 7-ditor për të gjithë pjesëtarët e stafit të klubit “granata” dhe afati përfundon mesnatën e 2 marsit, çka e bën të pamundur që futbollistët të zbresin në fushë nesër në orën 18:30.
“Ne shpresuam në një mirëkuptim me zyrën shëndetësore, por ata janë të prerë në qëndrimin e tyre dhe besoj se ndeshja do të shtyhet. Nuk mund të marrim vendim tjetër, pasi peshon edhe precedenti i ndeshjes Juventus-Napoli”, deklaroi Dal Pino.
Nga ana tjetër Zyra Shëndetësore Lokale e Torinos doli me një deklaratë zyrtare ku theksoi respektimin e karantinës, duke mos lënë vend për të marrë në konsideratë zhvillimin e ndeshjes së nesërme.
Aktualisht futbollistët e Torinos po qëndrojnë në karantinim të detyruar dhe dalin vetëm për të kryer seanca individuale stërvitore në ambientet e klubit. Karantina pritet të përfundojë mesnatën e 2 marsit, nëse nuk do të tjerë të prekur nga xhiroja e radhës e tamponëve.
