Empoli ka zyrtarizuar matematikisht rikthimin në elitën e futbollit italian, pasi kur kanë mbetur edhe dy javë nga mbyllja e kampionatit në Serinë B, kryeson me 70 pikë, 7 më tepër se vendi i dytë që mbahet nga Salernitana.
Skuadra toskane triumfoi me rezultatin e thellë 4-0 ndaj Cozencën pasditen e sotme dhe vulosi edhe matematikisht rikthimin në Serinë A, ndërsa mes autorëve të golave ishte edhe mesfushori i kombëtares shqiptare Nedim Bajrami.
Ky ishte goli i pestë sezonal për mesfushorin me origjinë nga Tetova, i cili ka qenë një protagonist absolut i Empolit dhe në muajin mars vendosi të heqë dorë nga përfaqësuesja zvicerane, për të veshur fanellën kuqezi të Shqipërisë.
Hodhi një hap drejt Serisë A edhe Monza e Berlusconit dhe Gallianit, që triumfoi me rezultatin minimal 1-0 ndaj Lecces, një rival direkt për një biletë direkte për në elitën e futbollit italian, megjithatë të dy këto skuadra, bashkë me Salernitanën do të duelojnë deri në fund për të shmangur zonën Play Off.