Pas startit bindës në ndeshjen hapëse ndaj Drenicës, Feronikeli kampion në fuqi i Kosovës zhgënjeu pasditen e sotme në transfertën ndaj Ballkanit.
Skuadra nga Drenasi humbi me rezultatin 3-1 një ndeshje që u komplikua shumë shpejt, pasi vendasit shënuan me Baftiun në minutën e 5-të dhe dyfishuan me Krasniqin në të 19-ën.
Feronikeli rihapi takimin në fillim të pjesës së dytë, kur Haxhi Neziri shënoi në portën e Ballkanit, por vetëm 3 minuta më vonë, vendasit u kundërpërgjigjën duke shënuar edhe golin e tretë me anë të Baftiut dhe duke marrë një fitore që e çon në krye të renditjes me 4 pikë.
Gjeti fitoren e parë në kampionat edhe Gjilani i Gentian Mezanit ,që arriti të triumfojë me rezultatin 0-3 në transfertën ndaj Ferizajt. Fjoart Jonuzi zhbllokoi ndeshjen në pjesën e parë, ndërsa në 45-minutëshin e dytë ishin Progni e Bushic, që vulosën suksesin e gjilanasve.
