Ballkani është rikthyer te fitorja pas humbjes me Dritën dhe është ngjitur në vendin e tretë në klasifikim për momentin. Skuadra e Ilir Dajës nuk fali në transfertën kundër Ferizajit të ngjitur në elitë këtë verë, pasi triumfoi me rezultatin 3-0.
Vendasit rezistuan deri në fund të pjesës së parë, kur Albion Rrahmani i ndëshkoi dhe e çoi Ballkanin në epërsi në dhomat e zhveshjes. Ekipit nga Suhareka i duhej edhe një gol qetësie dhe vijoi të sulmonte.
Goli erdhi dhe mban emrin e një mbrojtësi. Leotrim Bekteshi ishte ai që realizoi të dytin për Ballkanin, ndërkohë që pa u bërë dhjetë minuta u shënua edhe goli i tretë që mbylli llogaritë e këtij dueli.
Meriton Korenica shënoi në portën e Ferizajit dhe arkivoi tre pikët për Ballkanin, që shkon në kuotën e 12 pikëve, duke u renditur pas Gjilanit (14 pikë) dhe Dritës (17 pikë), por me 2 ndeshje më pak se skuadra e Nuhiut.
