Ballkani është padiskutim macja e zezë e Llapit në këtë sezon të Ipko Superligës së Kosovës. Skuadra nga Podujeva ndali hovin e fitoreve pasi barazoi 1-1 me Ballkanin që lufton për mbijetesë. Pasi e mposhti në fazën e dytë brenda në Podujevë, Ballkani e ndali sërish Llapin që rivalizon për titullin këtë herë në një barazim. Goli i shpejtë i Topallit goditi psikologjikisht llapjanët që barazuan shumë vonë vetëm në minutën e 84-t me një penallti të kthyer në gol nga Mentor Zhdrella. Me këtë pikë Llapi u ngjit në kuotën e 48 të tillave, 4 më pak se Feronikeli por do të humbasë terren në garën për titull nëse skuadra nga Drenasi fiton të dielën ndaj Trepça ’89.
Nuk ndalet më Drita që regjistroi fitoren e 4-t radhazi pasi mposhti në Gjilan 2-0 Lirinë duke e lënë në vendin e parafundit skuadrën nga Gjilani. Dy gola në fundin e sfidës në minutat 79 dhe 83 të Shaqirit dhe Haxhimusës i dhanë fitoren intelektualëve. Vazhdon të mos fitojë Drenica që ngeci në një barazim pa gola ndaj Ferizaj në shtëpi.