Luhen këtë të diel dy ndeshjet e fundit e javës së 24-t të IPKO Superligës së Kosovës, me protagoniste në fushën e blertë dy skuadrat kryesuese. Në orën 14:00, në Therandë, do të luhet Ballkani-Prishtina, ndërsa në orën 17:00, në kryeqytet, Flamurtari-Feronikeli. Dy përplasje mjaft interesante, rezultatet e së cilave mund të sjellin ndryshime në klasifikim vetën në garën për mbijetesë, ndërsa në krye të renditjes thjesht ngushtim ose thellim të diferencës.
Feronikeli vazhdon të kryesojë me 55 pikë, 4 më shumë se Prishtina, por bardhekaltrit do të tentojnë t’i vënë nën presion rivalët me një sukses të mundshëm ndaj Ballkanit. Sigurisht që sfida në stadiumin e Therandës parashikohet e vështirë për formacionin e Josës, sepse edhe vendasit kërkojnë pikë për t’iu larguar zonës së ftohtë.
Po kaq interesante është edhe përballja mes Flamurtarit dhe Feronikelit. Humbja e thellë me Prishtinën (3-0) të mërkurën e ka vënë në pozita shumë të vështira skuadrën kuqezi, që aktualisht renditet në zonën e barazhit. Në varësi edhe të rezultatit të përballjes mes Ballkanit dhe Prishtinës, një fitore e mundshme mund ta katapultojë Flamurtarit në vendin e 7-të.
Nikli ka triumfuar në dy përballjet e para këtë edicion ndaj kuqezinjve, 2-0 dhe 1-3, ndërsa synon që të njëjtën gjë ta bëjë edhe në këtë takim.
Të dyja këto ndeshje do të transmetohen drejtpërdrejt në SuperSport.