Buzëqeshin skuadrat udhëtuese në tre ndeshjet e ditës së diel në BKT Superligën e Kosovës. Ballkani mori një pikë në Podujevë përballë Llapit, sfidë që përfundoi në barazim 1-1.
Ermal Krasniqi kaloi ekipin e Ilir Dajës në avantazh në pjesën e parë, por Kastriot Selmani riktheu baraspeshën pas gjysmë ore lojë. Skuadra nga Suhareka e mbylli takimin me dhjetë lojtarë pas daljes me të kuq të Lumbardh Dellova (77’).
Ballkanit i nevojitet një pikë në katër ndeshjet e mbetura për të nisur zyrtarisht festën e titullit të parë kampion në histori. I njëjti rezultat u regjistrua edhe në përballjen Drita-Drenica.
Të dy golat u shënuan në fraksionin e dytë të takimit. Albin Krasniqi kaloi “Intelektualët” në avantazh, por kuqezinjtë nga Skënderaj evituan humbjen falë rrjetës së Genc Hamitit në minutën e fundit.
Hap fals i Dritës, që mbetet në vend të tretë me dy pikë mbi Llapin, ndërsa Drenica siguroi një pikë të rëndësishme për objektivin mbijetesë.
Të njëjtin objektiv dhe numër pikësh ka edhe Malisheva, që mposhti 0-2 Feronikelin e vendit të fundit në Drenas. Ekipi mik zgjidhi gjithçka në çerekorëshin e fundit të sfidës falë golave të Berishës dhe Marc-Olivier.
