Ballkani kthehet te fitorja në IPKO Superligë (kishte një humbje dhe dy barazime radhazi) dhe mbetet në garë për titullin e kampion. Skuadra nga Suhareka iu imponua 3-1 Trepçës ’89 në një sfidë të zhvilluar me ritëm të kënaqshëm dhe që mbeti e hapur sa i përket rezultatit deri pak minuta para fundit.
Ekipi i Ismet Munishit kaloi në epërsi në minutën e 19-të me Topallin, por mitrovicasit kthyen baraspeshën në rezultat me Manajn në të 23-tën, pasi ekzekutimit të saktë të një 11-metërshi.
Pjesa e dytë ishte edhe më e bukur, derisa në minutën e 78 Krasniqi kaloi sërish në avantazh Ballkanin, për të ardhur më pas te gol i Dakut tri minuta para përfundimit të kohës së rregullt, që vulosi rezultatin 3-1. Ballkani me këtë fitore rikthehet i treti me 49 pikë, tri më pak se Drita kryesuese.
Regjistron suksesin e katërt radhazi në kampionat Feronikeli, që iu imponua 2-1 Llapit, një rival i drejtpërdrejtë për vendin e pestë. Mevlan Zeka realizoi golin e parë të takimit në minutën e 7–të me penallti, që u fitua nga Besmir Bojku, pas ndërhyrjes së palejueshme të Benjamin Eminit. Epërsia e vendasve nuk zgjati shumë dhe llapjanët i barazuan shifrat në 1-1 me anë të Ersil Ymerit (18’).
Në minutën e 80-të Behar Maliqi u ndëshkua me kartonin e dytë të verdhë, duke i dhënë epërsinë numerike skuadrës nga Drenasi, që e gjeti golin e fitores vetëm pak çaste më vonë me Mevlan Zekën, që realizoi të dytin personal në këtë ndeshje, duke qenë vendimtar për këtë rezultat të skuadrës së tij.