IPKO Superliga e Kosovës nis këtë të premte me ndeshjen që do të zhvillohet në Suharekë mes Ballkanit dhe Trepçës ’89. Një takim ky i paparashikueshëm për rezultatet që kanë arritur dhe performancën që kanë shfaqur të dyja skuadrat në këtë fillim sezoni.
Ballkani është skuadra e surprizave në këto 5 javë të para. Formacioni që drejtohet nga Bekim Shotani ka marrë 2 fitore, dy humbje dhe një barazim dhe si për çudi, pikët e plota në dy raste i ka siguruar si udhëtues, ndërsa ndaj Feronikelit në Drenas është mundur minimalisht. Ndërkohë në takimet e shtëpisë është mposhtur nga Llapi si dhe ka barazuar me Prishtinën.
Trepça ’89, e drejtuar nga Gugash Magani, ka një ecuri më të dobët. E nisi me një barazim premtues ndaj Feronikelit, por më pas erdhën dy humbjet radhazi me Prishtinën dhe Gjilanin. Fitoja e thellë në fushën e KEK-ut shërbeu si frymëmarrje, por në takimin pasardhës në Mitrovicë u ndal në barazim 1-1 nga Drenica.
Në Suharekë parashikohet një ndeshje e hapur, ku do të kërkohet me ngulm fitorja, për të krijuar vazhdimësinë e rezultateve pozitive. Ballkani ka entuziazmin e ekipit që vjen nga një kategori më poshtë, ndërsa Trepça ’89 duhet të gjejë ekuilibrat në lojë dhe rezultate, për të mos e komplikuar më shumë renditjen, por edhe pozicionin e stafit teknik. Ky takim do të nisë në orën 15:45 dhe do të transmetohet në Supersport 3.
